स्वनिगः बन्दया झ्वलय् ८४ म्ह गिरफ्तार भिडियो स्वयादिसँ
न्हयगू दलं सञ्चार अध्यादेशया विरोधयासेँ सूचनाया हकया निंतिं शुक्रवाः याःगु स्वनिगः बन्दया झ्वलय् ८४ म्हेसित ज्वंगु गृह मन्त्रालयं धाःगु दु। बन्दया झ्वलय् न्हयगः सवारी साधनय् तोडफोड जूगु दु। बन्दया हुनिं थौं अप्वः धैथें पसः व गाडी बन्द जूगु खः। छुं छुं भाडाया सवारी साधन त व मोटरसाइकलत धाःसा चले जूगु खनेदूगु खः। बन्दया झ्वलय् स्कूल, क्याम्पसत धाःसा पूरा हे बन्द जूगु खः। न्हिनय् बसन्तपुलीं न्ह्याःगु जुलुस चिकंमुगः, जैसिदेगः, लगं, बर्मू त्वाः, ह्युमत, कोहिति, भिंद्य त्वाः जुसेँ मरुइ वनाः सभाय् हिउगु खः। सभाय् काँग्रेसया सुप्रभा घिमिरे, एमालेया राजेन्द्र श्रेष्ठ व नागरिक आन्दोलनया देवेन्द्रराज पाण्डें निरंकुशताया विरोधय् आन्दोलन न्ह्याकाच्वनेमाःगु खँ कनादिल। 28 October, 2005@ 2310 NST
-------------------------------------------------------------------------
मानवाधिकार आयोगं सरकारया कुंखिन
राष्ट्रिय मानवाधिकार आयोगं कान्तिपुर एफएमय् चान्हय् वनाः आक्रमण यायेमाःगु छुं हे कारण मदुगु धाःसेँ लुटे यानायंकूगु सामानत लित बीत सरकारयात इनापयाःगु दु। प्रेस स्वतन्त्रता व मौलिक हकया सम्मान यायेत नं आयोगं सरकारयात धाःगु दु। उगु आक्रमणयात कयाः आयोगं छानबिन याःगु खः। म्हिगः आयोगं सञ्चारमन्त्री टंक ढकालनाप स्पष्टिकरण नं काःगु खः। छानबिन लिपा थौं आयोगं विज्ञप्ति पितबिसेँ उगु खँ कंगु खः। 28 October, 2005@ 2310 NST
-------------------------------------------------------------------------
कान्तिपुर एफएम बन्द हे याइगु भिडियो स्वयादिसँ
सरकारं कान्तिपुर एफएम बन्द हे याइगु संकेत क्यंगु दु। थौं बिहीवाः सुथंनिसें एफएमया पुच्वस्थित ज्याकुथिपिने पुलिसतयसं घेरा तयाच्वंगु दु। प्रहरी हस्तक्षेपया प्रतिकार यायेत नागरिक समाज, राजनीतिक दलया नेता व कार्यकर्ता, पत्रकारत अन मुनाः धर्ना च्वनाच्वंगु दु। थ्वसिबेँ न्हयः म्हिगः न्हूगु अध्यादेश कथं समाचार ब्वनेमते धयातःसां छाय् समाचार ब्वनागु ? आ छंगू लाइसेन्स छाय् खारेज मयायेगु धकाः २४ घौ दुने स्पष्टिकरण बीत ख्याच्वः ब्यूगु खः। थ्वसिबेँ न्हयः वंगु शुक्रवाः चान्हय् पुलिसं कान्तिपुर एफएमया सामानत लुटे यानायंकाः पूर्वाञ्चल प्रसारण बन्द याकूगु खः। आः थ्व एफएमया प्रसारण स्वनिगलय् जक सीमित दु। 27 October, 2005@ 1112 NST
-------------------------------------------------------------------------
कन्हय् स्वनिगः बन्द
आन्दोलन यानाच्वंगु न्हयगु दलपाखेँ कन्हय् न्हापांगुखुसि स्वनिगः बन्दया ज्याझ्वः पितब्युगु दु। प्रेसयात दमन यानायंकेगु सरकारी नीतिया विरोधय् उगु बन्द यायेत्यंगु खः। नेपालय् यक्व ईधुंकाः थुज्वःगु बन्दया ज्याझ्व जुइत्यंगु खः। 27 October, 2005 @ 1112 NST
-------------------------------------------------------------------------
सरकारया नामय् कारण देखाउ आदेश
सञ्चार नियन्त्रण अध्यादेश जारी यायेमाःगु लिखित कारण पेश यायेत सर्वोच्च अदालतं सरकारया नामय् आदेश जारी याःगु दु। सञ्चार नियन्त्रण अध्यादेशया विरोधय् पत्रकार महासंघ लगायत ९ पेशाकर्मीतयगु संघसंस्थापाखेँ दायर रिट व कान्तिपुर एफएमं दायर याःगु मेगु रिटय् सुनुवाइयासेँ प्रधानन्यायाधीश दीलिपकुमार पौडेलया एकल इजलासं उगु आदेश ब्युगु खः। अध्यादेश कार्यान्वयन जुइके मबीत व सञ्चार संस्थाय् आक्रमण पनेत अन्तरिम आदेश बीगु कि मबीगु विषयलय् धाःसा १३ गते आइतबाः फुक्क मुद्दा छथाय् तयाः सुनुवाई जुइगु जूगु दु। अध्यादेशया विरुध्दय् आः तक स्वंगू रिट दर्ता जुइधुंकल। 25 October 2005 @ 1327
-------------------------------------------------------------------------
अध्यादेश पुनरावलोकन जुइमखुः सरकारया प्रवक्ता
सरकारया प्रवक्ता व सूचना तथा सञ्चार मन्त्री टंक ढकालं पत्रकारिता संचार अध्यादेश पुनरावलोकन यायेगु सरकारया सोचाइ मदु धयादीगु दु। कानुन उल्लंघन याइपिन्त कारबाही यायेत राज्य सुथय् तक पियाच्वनेफइमखु धासेँ ढकालं उकिं कान्तिपुर एफएमयात चान्हय् कारबाही यानागु धयादिल। सोमवार संचार समूहय् ग्वसाःग्वःगु साक्षात्कार ज्याझ्वलय् मन्त्री ढकालं माओवादीनाप वार्ता यायेत एमाले नेतात दिल्ली व रोल्पा न्हयाथाय् वंसां सरकारं विरोध मयायेगु तर गलत तत्वनाप साँठगाँठ यानाः राज्य संरचनाय् हताः याः वःसा उमित त्वःतेमखु धकाः ख्याच्वः बियादिल। जंगलय् वनाच्वंपिं मूलधारय् वयेत तयार जूसां दलतयसं उमित हतियार ल्ह्वनाः ति धकाः धयाच्वंगु द्वपं नं वयकलं बियादिल। 25 October 2005 @ 1327
-------------------------------------------------------------------------
नेवाः छेँयात युनेस्को सिरपा
भीमसेन थापाया पालय् दयेकातःगु पुलांगु नेवाः छेँयात नमुना घर कथं निर्माण याःगुवापत ख्वप, दत्तात्रयका रवीन्द्र पुरीयात थुगुसिया युनेस्को एसिया प्यासिफिक सिरपाः लः ल्हाःगु दु। एसिया व अष्ट्रेलिया महादेशया ३७ म्हेसिनं ब्वति काःगु उगु नमूना छेँ धेँधेँ बल्लाय् पुरीया नमूना छेँ दकले बांलाःगु ठहर जूगु खः। युनेस्कोया प्रतिनिधि कोटाकानो व जीटीजेडया निर्देशक विफ विनिक्सं पुरीयात सोमवाः सिरपा लः ल्हाःगु खः। पुरीं सन् १९९९ य् १५० दँ पुलांगु छेँ ७ लाख पुलाः न्यानाकयाः १५ लाख खर्च यानाः नमूना छेँ दयेकूगु खः। 25 October 2005 @ 1327
-------------------------------------------------------------------------
आत्मसमर्पण याइपिं माअोवादीया माफी बीगु
निर्वाचनया लकस दयेकेत जुजुया सरकारं वइगु पुस मसान्ततक माअोवादी ज्या त्वःता हातहतियार वा हातहतियारबिना आत्मसमर्पण याःसा माफी बीत कानुनी प्रक्रिया न्हयाकेगु घोषणा याःगु दु। सरकार नियन्त्रित सञ्चार माध्यमं सोमवाः उगु घोषणाया प्रचार यानाहःगु खः। 25 October 2005 @ 1327
-------------------------------------------------------------------------
बर्ड फ्लूपाखेँ नेपाल नं सतर्क जुइमाःगु
एसिया व युरोपया थीथी देशय् आतंक कथं न्यनाच्वंगु बर्ड फ्लू ल्वय् नेपालय् आः तक खनेमदुसां थ्व ल्वय्या सम्बन्धय् नेपालय् नं सतर्कता क्यनेमाःगु व समुदायस्तरतक उकिया प्रचार-प्रसार व्यापक यानाः यंकेमाःगु निर्णय याःगु दु। नेपाल रेडक्रस सोसाइटीया आवासीय प्रतिनिधि निकोलास रसेलया उपस्थितिइ सोमबाः स्वास्थ्य सेवा विभागय् च्वंगु बैठकं उगु निर्णय याःगु खः। 25 October 2005 @ 1327
-------------------------------------------------------------------------
थौं देन्यंकं एफएमं निगू मिनेट प्रसारण बन्द याइगु
कान्तिपुर एफएमय् शुक्रबाः चान्हय् पुलिसं सामान लुटे यानायंकूगु विरोधय् थौं सनिल ७ ता इलय् देया फुक्क एफएमतयसं निगू मिनेट प्रसारण बन्द याइगु जूगु दु। उखे कान्तिपुर सरकारी ज्याःयात चुनौति बिसेँ सर्वोच्च अदालत वनीगु जूगु दु।23 October 2005 @ 1335
-------------------------------------------------------------------------
कान्तिपुर नं बन्द याइगु ?
सञ्चार मन्त्रालयया प्रवक्तां म्हिगः नेपाल टेलिभिजनय् न्हूगु अध्यादेशया कडा नक्सां अनुगमन यानाः हाचां गाइपिन्त कारबाही यायेगु ख्याच्वः ब्यूगु दु। उगु अध्यादेशय् छगू हे संस्थायात रेडियो, टिभी व छापा माध्यमं चले याके मबीगु व थ्व न्हापा चले यानाच्पंपिंसं स्वलाया दुने छगू माध्यम मेगु हे व्यवस्थापनयात लः ल्हायेमाःगु व्यवस्था दु। थ्व व्यवस्थाया लिधंसाय् आः सरकारं कान्तिपुर पत्रिकायात नं बन्द यायेगु संभावना दु। 23 October 2005 @ 1335
-------------------------------------------------------------------------
फत्तेमानयात लाइफटाइम एचिभमेण्ट अवार्ड
फत्तेमान राजभण्डारीयात कान्तिपुर एफएमं लाइफटाइम एचिभमेण्ट अवार्ड लः ल्हाःगु दु। थःगु ७ क्वःगु वार्षिकोत्सवया झ्वलय् एफएमं थुगुसि न्हापांगु खुसि थ्व अवार्ड ब्युगु खः। 23 October 2005 @ 1335
-------------------------------------------------------------------------
सत्यमोहन जोशीयात महाकवि देवकोटा सिरपा
नेपाली वाङ्मय प्रतिष्ठानं थुगुसिया महाकवि देवकोटा सिरपा साहित्यकार सत्यमोहन जोशीयात बीगु जूगु दु। नेपालभाषाय् 'जयप्रकाश' व 'श्वेतचैत्य' निगू महाकाव्य च्वया ब्युगु योगदानया निंतिं वयकःयात थ्व सिरपाः बीगु निर्णय याःगु खः। नेपाली व नेपाःया छुं नं राष्ट्रिय भाषाय् महाकाव्य वा महाकाव्यसम्बन्धी समालोचना च्वइपिं साहित्यकारयात थ्व सिरपा दँयदसं बीगु यानाच्वंगु दु। 20 October 2005 @ 2250
-------------------------------------------------------------------------
माधव नेपाल भारतय् वनीगु
भारत भ्रमणय् वनीगु पाः आः माधव नेपालया। नेकपा एमालेया महासचिव माधव नेपाल आइतवाः भारतय् थ्यनीगु जूगु दु। एमालेया मेम्ह नेता केपी अोली थौंकन्हय् भारतय् हे दु। 20 October 2005 @ 2250
-------------------------------------------------------------------------
नेपाःया स्थिति रिपोर्ट यायेत भारतीय राजदूत दिल्लीइ
जुजुं मन्त्रिपरिषदय् हिउपाः हयेत्यंगु धकाः हल्लाया बीच नेपाःया राजनीतिक स्थितिबारे ब्रिफिङ यायेत नेपाःया निंतिं भारतीय राजदूत शिवशंकर मुखर्जी न्हू दिल्लीइ थ्यंगु दु। 20 October 2005 @ 2250
-------------------------------------------------------------------------
ऐतिहासिक दीपङ्खा यात्रा न्ह्यात
३८ दँ धुंकाः थौंया दिनय् चू लाःगु दुर्लभ योगय् थौं सोमवाः सुथंनिसें ऐतिहासिक दीपङ्खा यात्रा न्हयाःगु दु। ५० द्वःति मनू सहभागी जूगुलिं यलया नागबहालं सुथय् प्यताः मजानिबलय् हे यात्रा न्ह्याकाछ्वःगु खः। थौं चच्छि यात्रा यानाः मंगलवाः लगंख्यलय् थ्यंकाः यात्रा क्वचाइ। असोज शुक्ल पूर्णिमा, रेवती नक्षत्र, हर्षा योग, सोमबाः व संक्रान्ति संगम थेंजाःगु न्यागू दुर्लभ योग छक्वलं चूलात धाःसा जक दीपङ्खा यात्रा याइ। थ्व यात्राया झ्वलय् हिन्दु व बौद्ध धर्मावलम्बीतयसं येँ व यलय् हिन्दु व बौद्ध १३१ गू शक्तिपीठय् पूजा याइ। थ्व यात्राय् छपलाः छिगु बराबर छगू तोला लुँ दान याःगु बराबर धर्म लाइ धाइ। 17 October 2005 @ 1350
-------------------------------------------------------------------------
'माया रे रत्न'या प्रिमियर
नेपालभाषाया न्हूगु संकिपा 'माया रे रत्न'या न्हापांगु क्यनेज्या आइतवाः ख्वपय् जुल। धनी व गरिबदथुइ जुइगु भेदभाव व सामाजिक परिवेशयात आधार दयेकाः दयेकूगु थ्व संकिपाया निर्देशन विष्णु सक्वनं यानादीगु खःसा प्रदीप अर्याल व महन्तलाल मल्लं च्वयादीगु खः। पौने दुई घण्टाया थ्व संकिपा बज्रयोगिनी फिल्म प्रा. लि.या ब्यानरय् दयेकूगु खः। 17 October 2005 @ 1250
-------------------------------------------------------------------------
तःमुँज्याय् न्हापलाःपिन्त सिरपा
नेपाल मजदुर किसान पार्टीया नायः नारायणमान बिजुक्छें २५ क्वःगु नेपालभाषा साहित्य तःमुँज्याय् थीथी विधाय् न्हापलाःपिं साहित्यकारतयत आइतवाः सिरपा व दसिपौ लः ल्हानादिल। मुँज्याय् बाखँपाखे हरिसुन्दर पोतामा, कृष्णेश्वरी दुवाल व लीला न्याईंच्याईं, कवितापाखे प्रहार दुवाल, शम्भुराम प्रजापति व अमोद उलक व निबन्धपाखे ओम धौभारी, श्यामकृष्ण खुलीमुली व राजकुमार लघु छसिकथं न्हाप, ल्यु, व लियां ल्यु जुयादीगु खः। ज्याझ्वलय् २०६१ सालया प्रवेशिका परीक्षाय् ख्वप जिल्लापाखेँ दकले अप्वः ल्याः हयादीम्ह सामुदायिक विद्यालयपाखेया सुनिल श्रेष्ठ व अनिता कायस्थ व संस्थागत विद्यालयपाखेया नारायण प्रजापति व उर्जला महर्जनयात नं सम्मान याःगु खः। 17 October 2005 @ 1252
-------------------------------------------------------------------------
नेपाः युनेस्कोया कार्यकारी दुजः
नेपाः थ्वपालय् संयुक्त राष्ट्र संघीय शैक्षिक, वैज्ञानिक व साँस्कृतिक संगठन युनेस्कोया कार्यकारी दुजलय् निर्वाचित जूगु दु । नेपाः आः प्यदँ तक युनेस्कोया कार्यकारी दुजः जुइ ।
परराष्ट्र मन्त्रालयं धाःकथं नेपाःया लिसें दुजलय् एशियाली पुचःपाखें भारत, जापान, चीन, फिजि, क्रिगिस्तान नं कार्यकारी दुजलय् निर्वाचित जूगु खः । थगुने थ्व हे पदय् जूगु निर्वाचनय् नेपाः बूगु खः । 16 October 2005 @ 1127 NST
-------------------------------------------------------------------------
कविकेशरीया वहःया पाँयम्वहः पिथन
कवि केशरी चित्तधर 'हृदय'या सच्छिदँ बुन्हि व नेपाल संवत् ११२६ न्हूदँया लसताय् लाकाः कवि 'हृदय'या किपा कियातःगु वहःया पाँयम्वहः शनिवाः विमोचन जुल । नेपालभाषा परिषद्या नायः फणिन्द्ररत्न वज्राचार्यं छगू ज्याझवःया दथुइ उगु पाँय्म्वहः विमोचन यानादीगु खः ।
भिंतुना गुथिपाखें नायः रविन्द्र तुलाधरया सभापतित्वय् शनिवाः जूगु उगु विमोचन ज्याझ्वलय् न्ववानादिसें भाजु वज्राचार्यं वहःया पाँयम्वहःलय् कवि हृदयया किपा तयाः वय्कःया तःधंगु कदर जूगु बिचाः प्वंकादिल ।
ज्याझवलय् प्राध्यापक प्रेमशान्ति तुलाधरं कवि 'हृदय'या जीवनी बारे कनादिलसा नेपालभाषा मंकाः खलःया छ्यांज्ये नरेशवीर शाक्यं पाँयम्वहः पिथनेगु ज्यायात च्वछायादिल । पाँयम्वहः पिथनाया कजि रत्नवीर शाक्यं आः थःपिंसं नेपालभाषाया मेमेपिं साहित्यकारपिनि नं किपा तयाः पाँयम्वहः पिथना वनेगु ग्वसाः दुगु खँ कनादिल । 16 October 2005 @ 1127 NST
-------------------------------------------------------------------------
विराट नेपालभाषा साहित्य सम्मेलन क्वचाल
थुगुसीया ४२ क्वःगु राष्ट्रिय विराट नेपालभाषा साहित्य सम्मेलन थौं शनिवाः ख्वपया अरनिको सभा भवनय् क्वचाल। "जातीय स्वतन्त्रतायात दबे यानाः राष्ट्रया उत्थान जुइमखु" मू नारानापं न्ह्यागु उगु निन्हूया सम्मेलनय् नातिबज्र बज्राचार्य, माधव मूल, किरण शाक्य, अोमकृष्ण हाडा, कृष्णभक्त बोडे, रामगोपाल आशुतोष, पुष्प मुनकर्मी, राजभाइ जकमि, शान्तराज मानन्धर, ह्रदयप्रसाद मिश्रनापं ४७ म्ह पुलांपिं व न्हूपिं साहित्यकारतयसं नेपालभाषाया चिनाखँ, बाखँ, ख्यालि खँ, हाइकु न्यंकूगु खः। विराट गुठीया नायः नरेन्द्रभक्त हाडां लर्नर्स एकेडेमीयात थुगुसिया विराट सांस्कृतिक सिरपा लः ल्हानादिल। अथेहे हाडां सगरमाथाया सफल आरोहण यानादीम्ह न्हापांम्ह नेवाः मयजु मोनी मुलेपतियात नं सम्मान यानादिल। 15 October 2005 @ 2156 NST
-------------------------------------------------------------------------
दच्छिया दुने संसदया चुनाव याकेगु जुजुया उजं
दलतयसं नगर निर्वाचनय् ब्वतिकायेमखु धकाः धयाच्वंबलय् जुजुं धाःसा दच्छिया दुने प्रतिनिधि सभाया चुनाव याकेत निर्वाचन आयोगयात उजं ब्युगु दु। मोहनिया लसताय् देशवासी नामय् थौं ब्युगु सन्देशय् जुजुं २०६३ सालया दुने चुनाव याकेगु उजं ब्युगु खः। वंगु दँया माघ १९ गते शासनसत्ता थःगु ल्हातय् कायेगु घोषणा याःबलय् हे जुजुं स्वदँया दुने चुनाव याकेगु खँ कंगु खः। जुजुया सन्देशय् चुनाव स्वच्छ व धाँधली मजुइकेत प्रजातन्त्रय् निष्ठा तइपिं सकल अन्तर्राष्ट्रिय समुदाययात सक्रिय ग्वाहाली यायेत नं इनाप याःगु दु। अथेहे जुजुं घोषणा जुइधुंकूगु नगर निर्वाचनय् ब्वति कयाः प्रजातन्त्रया हितय् योगदान बीत नं फुकसित इनाप याःगु दु। 12 October 2005 @ 0056 NST
-------------------------------------------------------------------------
आः देया राजनीति गुखेपाखे ? (NEWS ANALYSIS)
मोहनिया इलय् लाकाः तःधंगु हे हिउपाः जुजुं हइगु धकाः हुइनाभुइना जुसां प्रेसयात नियन्त्रण यायेत छगू अध्यादेशबाहेक जुजुं संसदया निर्वाचनया घोषणा यानाः सकसित छगू हदतक अजू चायेका ब्युगु दु। थुकियात माअोवादीं अन्तर्राष्ट्रिय समुदाययात प्रभावय् लाकेत युध्दविरामया घोषणा याःगु नाप तुलना यानाहःगु दु। अमेरिका, युरोपियन युनियन थेंजाःपिं अन्तर्राष्ट्रिय शक्तित याकनं संसदया निर्वाचन यानाः जनप्रतिनिधियात सत्ता लः ल्हायेगु पक्षय् दुगुलिं उमित प्रभावय् लाकेत थ्व घोषणा जूगु प्रष्ट खनेदु। मोहनि लिपा भारतया भ्रमणय् वनेत्यंम्ह जुजुं उगु भ्रमणयात ध्यानय् तयाः नं थ्व घोषणा याःगु जुइमाः। जुजुं निर्वाचनया घोषणा यायेधुंकाः उकी ब्वति मकाःसेँ आन्दोलन न्यंका यंकेगु खँ दलतयत व उमित समर्थन यायेत अन्तर्राष्ट्रिय शक्तितयत थाकूइ। अथेला दलतयगु आधिकारिक प्रतिक्रिया थ्व सम्बन्धय् मवःनी। तर उमिसं स्थानीय निकायया निर्वाचन थें थुकियात नं बहिस्कार याइगु संभावना अप्वः दु। चुनावया घोषणां देशय् द्वन्द्व धाःसा अझं अप्वइगु निश्चित दु। स्वलाया निंतिं युध्दविराम याःपिं माअोवादीतयसं थःगु अस्तित्वया निंतिं नं चुनाव याकेमबीगु प्रष्ट हे दु। उकिया निंतिं उमिसं युध्दविराम स्वलासिबें अप्वः तःहाकीगु संभावना मदु। चुनावयाये धयां नं याकेमबिल धकाः जुजुं माअोवादीयात अन्तर्राष्ट्रिय समुदायसमक्ष बदनाम यायेगु नं थ्व बांलाःगु ह्वताः खः। समग्रय् माअोवादीं युध्दविराम यानां जुजुयात चेसया कासाय् थें गुगु "चेक" ब्युगु खः, जुजुं थःगु चालं उकियात रक्षा यासेँ मेगु चालं आक्रमण याःगु खः थ्व। 12 October 2005 @ 0126 NST
माअोवादीपाखेँ सैनिक अपहरित
कपिलवस्तुइ थःथिति नापलाःवंम्ह छम्ह सैनिक जवानयात माओवादीतय्सं अपहरण यानायंकूगु दु। कपिलवस्तुया निबुबा गाउँ विकास समितिइ च्वंपिं थः छेँजःपिं नापलाःवंम्ह अर्घाखाँचीया सिमलपानी गाउँ विकास समितिया सैनिक जवान कृष्णकुमार थारुयात माओवादीतयसं शुक्रवाः अपहरण यानायंकूगु खँ सेनाया २२ नम्बर बाहिनीं धाःगु दु। थारुयात सकुशल त्वःतेगु निंतिं वया छेँजःपिंसं मानव अधिकारवादी व पत्रकारतयत इनाप याःगु दु। 9 October 2005@ 1548
-------------------------------------------------------------------------
"द्वन्द्वया हुनिं हे लगानी जुइमफूगु"
निक्वःगु विश्व सम्मेलनया निंतिं येँय् मुनाच्वंपिं गैर आवासीय नेपालीतय्सं राजनैतिक अस्थीरता व द्वन्द्वया कारणं नेपाः अन्तर्राष्ट्रिय लगानीकर्तातय् निंतिं आकर्षणया केन्द्र जुइ मफुगु खँ धाःगु दु। उमिसं खुदँ न्ह्यवंनिसें हये धाःगु प्रबिधि हस्तान्तरण ऐन, कम्पनी ऐन लगायतया ऐनत थौ तकं महःगुलिं सरकारया आलोचना नं यात। उमिसं आः एसियाली महादेशय् विदेशी लगानी चीन, हङकङ, भारत, अष्ट्रेलिया, दक्षिण कोरिया, भियतनाम लगायतया देशय् आकर्षण जूगुलिं नेपालं अन सिबें छु अप्वः सुबिधा बीफु धकाः बिदेशीतय्सं न्ह्यसः तयेगु याना वयाच्वंगु खँ नं कन। येँय् जुयाच्वंगु गैर आवासीय नेपालीतय् निक्वःगु विश्व सम्मेलनया आइतवाः क्वचाल। सम्मेलनय् ब्वति कयाच्वंपिं गैर आवासीय नेपालीतयसं नेपालय् शिक्षाया गुणस्तर बांलाः मजूगुलिं लगानीकर्तातयत दक्ष जनशक्तिया अभाव जुइ लाकि धइगु चिन्ता जुयाच्वंगु खँ नं कन। 9 October 2005@ 1547
-------------------------------------------------------------------------
जुजु व लानि स्याङजा सवारी
झी जुजु श्री ५ महाराजाधिराज ज्ञानेन्द्र वीर बिक्रम शाहदेव व लानी श्री ५ बडामहारानी कोमल राज्य लक्ष्मी देवी शाह शुक्रवाः स्याङजाया अलामदेवी देगलय् सवारी जुयाबिज्यात।
अन वसपोलपिसं पुजा अर्चना यानाबिज्यात । वसपोलपिं शुक्रवाः हे पोखरा लिहांबिज्याःगु दु। वसपोलपिं पश्चिमाञ्चल विकास क्षेत्रया वस्तुस्थिति थुइकेत छुं न्हि न्ह्यवंनिसें पोखराय् च्वना बिज्यानाच्वंगु खः। 7 October 2005@ 641
-------------------------------------------------------------------------
एनआरएनया विश्व सम्मेलनया युवराजपाखें उलेज्या
श्री ५ युवराजाधिराज पारस वीर विक्रम शाहदेवं शुक्रवाः येँया वीरेन्द्र अन्तराष्ट्रिय सम्मेलन केन्द्रय् गैर आवासीय नेपालीतय् निक्वःगु विश्व सम्मेलनया उलेज्या यानाबिज्यात । श्री ५ युवराज्ञी हिमानी राज्यलक्ष्मी देवी शाह नं उगु ज्याझवलय् समुपस्थित जुयाबिज्याःगु खः। श्री ५ या सरकार, नेपाल उद्योग वाणिज्य महासंघ व गैर आवासीय नेपाली अन्तर्राष्ट्रिय समन्वय परिषदं मंकाः कथं ग्वसाःग्वःगु गैर आवासीय नेपालीतय् निक्वःगु सम्मेलनय् देशं पिने बसोबास यानाच्वंपिं नेपालीतय् लगानीयात संस्थागत रुपं न्ह्याकेत झिगू अर्ब तकाया लगानी कोषया स्थापना, द्वन्द्व समाधान व विश्वय् नेपाःया सकारात्मक छवि दयेकेत गैर आवासीय नेपालीतय्सं निर्वाह यायेफइगु भूमिकाया बारे व्यापक सहलह जुइ। सम्मेलनया उलेज्या समारोहय् न्ववानादीसें अर्थमन्त्री मधुकर शमशेर राणां विदेशय् थम्हं आर्जन याःगु सीप, पूँजी व प्रविधियात नेपालय् लगानी यायेत गैर आवासीय नेपालीतय्त इनाप यानादिल । गैर आवासीय नेपाली अन्तर्राष्ट्रिय समन्वय परिषदया अध्यक्ष डा. उपेन्द्र महतों सार्क राष्ट्रं पिने झिंप्यंगू लाख नेपालीत बसोबास याना वयाच्वंगु जानकारीबिसें थ्व सम्मेलन थीथी देशय् न्यनाच्वंपिं नेपालीतय्त मुंकीगु छगू विश्व अभियान खः धयादिल ।वय्कलं सरकारं छुं न्हि न्ह्यः हःगु गैर आवासीय नेपाली सम्बन्धी अध्यादेशय् तःगू हे खँत त्वःफ्यूगुलिं उकिइ सुधार यायेत सरकारयात इनाप यानादिल । गैर आवासीय नेपालीतय् लगानी दुकायेगु ताः तयाः २०६० साल कार्तिकय् येँय् गैर आवासीय नेपालीतय् न्हापांगु सम्मेलन जूगु खः । 7 October 2005@ 641
-------------------------------------------------------------------------
युध्दविराम लिपा नं कब्जाया ज्या मदिउ
राष्ट्रिय मानव अधिकार आयोगं युद्धविराम लिपा नं माओवादीतय्सं नागरिकतय्त कब्जाय् कायेगु ज्या मदिकूगु खँ कंगु दु । थीथी जिल्लाया स्थलगत अध्ययन लिपा आयोगं मनूतय् हत्या यायेगु, यातना बीगु व विस्फोट याकेगु ज्या म्हो जूसां नं माओवादीं नागरिकतय्त कब्जाय् कायेगु ज्या धाःसा मदिकूगु निष्कर्ष पिकाःगु दु । आयोगं मनूतय्त कब्जाय् कायेगु ज्या तत्काल बन्द यायेत माओवादीयात आग्रह नं याःगु दु । संकटकालय् मानवअधिकारया अनुगमन प्रतिवेदन र्सार्वजनिक यायेत शुक्रवाः ग्वसाः ग्वःगु पत्रकार सम्मेलनय् ब्यूगु जानकारी कथं माओवादीं तःक्वः हे मानव अधिकार व मानवीय कानूनया उल्लंघन यानाच्वंगुलिं थज्याःगु ज्या दिकेत नं आग्रह याःगु दु । अथेहे संकटकालया घोषणा लिपा राज्यं पालना यायेमाःगु नियमया पूर्ण पालना मयासे नागरिकया अधिकारय् हमला याःगु द्वपं नं आयोगं ब्यूगु दु ।
आयोगं याःगु सिफारिसयात सरकारं इलय् ब्यलय् माने मयाःगु खँ न्ह्यथँसें अज्याःगु सिफारिस कार्यान्वयन यायेत नं सरकारयात आग्रह याःगु दु । 7 October 2005@ 641
-------------------------------------------------------------------------
आर्मी ड्रेसय् जुजु खु घौ न्यासिवन
जुजु व लानिं बिहीवाः पश्चिम क्षेत्रीय प्रहरी तालीम केन्द्रनिसेँ बुटवल बसपार्क न्हयःने दुगु लुम्बिनी अन्चल प्रशासन कार्यालयतक थ्यंमथ्यं खु घौ न्यासिना जनतानाप खँल्हाबल्हा यात। जुजु अब्ले आर्मी ड्रेस पुनातःगु खः। जनतानाप नापलायेत थःत जुइगु दुःखया छुं हे पर्वाह मयायेगु धकाः जुजुंलिपा पत्रकारत नाप विचाः प्वंकल। थौंकन्हय् जुजु पश्चिमाञ्चल भ्रमणय् दु। 7 October 2005 @ 831
-------------------------------------------------------------------------
तःधंगु राजनीतिक दुर्घटना जुइफूः ईयु ट्रोइका
नेपाः भ्रमणय् वःगु युरोपेली युनियनया छगू उच्चस्तरीय पुचः ट्रोइका स्वन्हूलिपा लिहांवंगु दु। लिहां वने न्हयः ट्रोइका पुचलं याःगु पत्रकार सम्मेलनय् समस्या समाधानया निंतिं याकनं प्रभावकारी पलाः चाले मयात धाःसा तःधंगु दुर्घटना जुइफूगु चेतावनी ब्युगु दु। प्रभावकारी बहुदलीय व्यव्स्था हे नेपाःया समस्या समाधान खः धकाः उमिसं धाल। थुकिया निंतिं फुक्क संवैधानिक शक्ति छप्पं जुइमाःगुली नं उमिसं बः बिल। 7 October 2005 @ 830
-------------------------------------------------------------------------
एनआरएनया सम्मेलन थौं
गैर आवासीय नेपामि (एनआरएन) या निक्वःगु सम्मेलन थौं शुक्रवाःनिसेँ येँय् न्ह्यायेत्यंगु दु। सम्मेलनया उलेज्या युवराज पारसपाखेँ जुइ। सम्मेलनय् न्यासःम्ह एनआरएन व निसः उद्यमी व्यवसायीतयसं ब्वति कायेत्यंगु दु। नि दँ न्ह्यः न्हापांगुखुसि येँय् हे एनआरएनतयगु न्हापांगु अन्तर्राष्ट्रिय सम्मेलन जूगु खः। 7 October 2005 @ 827
-------------------------------------------------------------------------
जुजुं अपमान याःगुलिं इयु प्रतिनिधित तंम्वल
नेपाःया वर्तमान राजनीतिक अवस्था थुइकेत, युरोपेली युनियनया मंगलवाः येँय् थ्यंकःवःगु छगू उच्चस्तरीय पुचलं बुधवाः सरकारी उच्च अधिकारी व विपक्षी नेतातयत नापलाःगु दु। तर जुजु धाःसा उपिं अन थ्यंगु दिनय् हे पोखरा सवारी जुयाः थःपिन्त अपमान याःगु कथं उमिसं काःगु धाःगु दु। स्वन्हुतक नेपालय् च्वनीगु युरोपेली युनियनया उच्चस्तरीय पुचलं नागरिक समाज व नेपालय् च्वंगु अन्तर्राष्ट्रिय समुदायया प्रतिनिधीत नं नापलाइगु ज्याझ्वः दु । पुचःया नेतृत्व दक्षिण एशिया व अफगानिस्तानया निंति बेलायतया बिदेश व कमनवेल्थ अफिसया निर्देशक टम फिलीप्सयानादीगु दु । थगुने न युरोपेली युनियनया पुचः नेपाःया अवस्था थुइकेत थन वःगु खः ।
-------------------------------------------------------------------------
यल नेवाः महोत्सव न्ह्यात
नेपालभाषा मंकाः खलः यलया ग्वसालय् जूगु यल नेवाः महोत्सव मंगलवाः छगू ज्याझ्वःया दथुइ नेपालभाषा एकेडमिया चान्सलर सत्यमोहन जोशी उलेज्या यानादिल । ज्याझ्वलय् न्ववासेँ भाजु जोशीं नेवाःतय्स सयेकातःगु कला व सीपयात पिने ब्वयेगु लागि थज्याःगु ब्वज्यात याना च्वनेमाःगु खँ कनादिल । ज्याझ्वलय् नेपालभाषा मंकाः खलः येँया नायः पद्मरत्न तुलाधरं नेवाःतय्त आर्थिक रुपं न सवल याना यंकेमाःगु थौंया आवश्यकता खः धयादिल । नेवाः देय् दबूया नायः मल्ल के. सुन्दरथौंया इलय् नेवाःतय्सं केवल जाति भाषा जक धयामगाः, थःपिनि आर्थिक सामाजिक पक्षयात नं ध्यान बीमाः धयादिल । ज्याझ्वः नेपालभाषा मंकाः खलः यलया नायः सुरेश प्रधानया सभापतित्वय् जूगु खः । नेपालभाषा मंकाः खलः यलयाःगु थ्व निक्वःगु नेवाः महोत्सव खः । महोत्सवय् यलया नेवाःतय्सं उत्पादन याःगु थीथी हस्तकला ज्वलंया नापकापः थायेगु, चाया थलबल दयेकेगु ज्याया प्रत्यक्ष ब्वज्या यानातःगु दु । महोत्सवय् न्हियान्हिथमाःगु ज्वलंया नापसमाःया ज्वलं, ब्वसा ज्वलआदि नब्वयातःगु दु । महोत्सव न्यान्हु तक न्ह्याइ।
-------------------------------------------------------------------------
नेवाः देय् दबूली हाकनं मल्ल के सुन्दर निर्वाचित
आइतवाः क्वचाःगु नेवाः देय् दबूया प्यक्वःगु तःमुँज्यां वर्तमान नायः मल्ल के. सुन्दरयात हे हानं मेगु पदावधिया लागिं नायः पदय् निर्विरोध ल्यःगु दु। उक