|
|
|
-----------------------------------------------------------------
जुजु व लानि कतारय्
सार्क सम्मेलन
क्वचायेधुंकाः ट्युनिसियाया सूचना सम्मेलनय् ब्वति कायेत जुजु व लानि सोमवाः
कतार थ्यंगु दु। जुजु व लानि स्व वाःया निंतिं भ्रमणय् वंगु खः।
ट्युनिसियाधुंकाः जुजु व लानि थीथी अफ्रिकी देया भ्रमणय् वनी।
-----------------------------------------------------------------
अदालत नं निष्पक्ष मजूगु द्वपं
भिडियो स्वयादिसँ
सञ्चार लागायात नियन्त्रण यायेत हःगु अध्यादेशया विरोधय् आइतवाः येँय् तःजिगु र्याली व सभा जुल। ज्याझ्वः शान्ति व लोकतन्त्रया निंतिं नागरिक आन्दोलन, नेपाल पत्रकार महासंघ व स्वतन्त्र रेडियो बचाउ आन्दोलनया मंकाः आह्वानय् जूगु खः। त्रिपुरेश्वरं न्हिनय्सिया २ बजे सुरु जूगु उगु र्याली न्हूगु बानेश्वर थ्यंकाः सभाय् हिउगु खः। सभाय् न्ववापिं वक्तातयसं सञ्चार अध्यादेश लागू यायेत बः बीकथं सर्वोच्चं याःगु फेसलाया कुंखिउगु खः। उमिसं अदालत नं निष्पक्ष मजूगु द्वपं ब्युगु खः।
-----------------------------------------------------------------
अमेरिकाया
पोर्टल्यान्डय् न्हूदँ
अमेरिकाया
पोर्टल्यान्डय् वंगु नोभेम्बर ६ तारिखकुन्हू नेपाल संवत् ११२६ न्हूदँया
लसताय् छगू ज्याझ्व जुल। ज्याझ्वया पाहांपिन्त नेवाः अर्गनाइजेसन अफ
अमेरिकाया दया शाक्य व अोरिगनया नेपालीतयगु संगठनया वर्तमान अध्यक्ष कुश
श्रेष्ठं लसकुस यानादीगु खः। नेवाः अर्गनाइजेसन अफ अमेरिकाया उपाध्यक्ष दया
शाक्यं नेपाल संवतया क्यालेण्डर छगू जातिं जक मखु, नेपाः सकल नेपालीतयसं
छ्यलेमाःगुली बः बियादिल। लक्ष्मी द्यः व नेपाल संवतया पलिस्था यानादीम्ह
शंखधर साख्वाःया किपातय् पूजा यानाः ज्याझ्व न्ह्याःगु खः। ज्याझ्वलय् नेपाल
संवतनाप सम्बन्धित थी थी हलंज्वलं व किपात प्रदर्शन याःगु खः। उगु हे भेलां
एनअोएया पोर्टल्यान्ड च्याप्टरया नं गठन यात। च्याप्टरया दुजय् दया शाक्य,
बुध्दलक्ष्मी शाक्य, दीवाकर महर्जन, राजेश महर्जन, अनिरुध्द महर्जन, प्रमोद
कारञ्जित, सुरेन्द्र शाक्य, केबिन महर्जन व सुनील ताम्राकार दी।
मेमेगु किपात
-----------------------------------------------------------------
नेदरल्यान्ड्सय् नेपाःया लोकतान्त्रिक संघर्षया विषयस गोष्ठी
नेदरल्यान्ड्सया लेइदेन विश्वविद्यालयया राजनीति शास्त्र विभागं छुं दिं न्हयः नेपाःया लोकतन्त्रिक संघर्षया विषयस छगू गोष्ठी याःगु दु। त्रिभुवन विश्वविद्यालयया प्राध्यापक माणिकलाल श्रेष्ठ मू पाहां कथं सःता जूगु उगु ज्याझ्वलय् वयकलं प्रजा परिषद्या गठनंनिसेँ नेपाली लोकतान्त्रिक आन्दोलनया खँ लुमंकूसेँ न्ह्याबलेँ जनतायात निर्णयया अधिकारपाखेँ वञ्चित यातातःगु कनादिल। वयकलं राणा शासनविरुध्दया आन्दोलनं राणा शासन अन्त्य जुसां उगु विद्रोहया लिच्वःया निर्णय नेपाली जनता, आन्दोलनया नेतृत्व याःगु पार्टी नेपाली काँग्रेसं याःगु मखसेँ भारतीय प्रधानमन्त्री जवाहरलाल नेहरुया रोडम्यापकथं जूगु तथ्य न्ह्यब्वयादिल। प्राध्यापक श्रेष्ठं नेतातयसं थःगु संघर्ष बीचय् हे अलपत्र यायेमखु व तानाशाही सत्तानाप सम्झौता यायेमखु धकाः वचं बिल धाःसा जनता आः नं पूर्ण सक्रिय राजतन्त्रया विरुध्द आन्दोलनय् वयेत तयार जूगु कनादिल। लेइदन विश्वविद्यालयया डा बालगोपाल श्रेष्ठ व डा रेन्स्के डोरेनस्प्लिटया ग्वसालय् जूगु उगु गोष्ठीइ विभागीय कर्मचारी व विद्यार्थीत, नेपालय् ज्या यानाच्वंपिं डच एनजीअोया प्रतिनिधितयसं ब्वति काःगु खः।
-----------------------------------------------------------------
संविधान दिवसय् सत्याग्रह
सीधुंकूगु संविधानया
लुमन्तिइ थौं बुधवाः न्हूगु बानेश्वरय् सुथसिया साढे ६ बजेनिसेँ १२ घौया
सत्याग्रह न्हयागु दु। सत्याग्रहय् मानवअधिकारकःमित, नागरिक समाज अले
राजनीतिक दलया नेता व कार्यकर्तातयसं ब्वति कयाच्वंगु दु। उमिसं ख्याली खँ,
कविता, मुक्तक कनाः ई फ्यानाच्वंगु दु। ज्याझ्वलय् दलया ध्वाँय् तयेके मब्यु।
सत्याग्रहय् ब्वति कायेत नां च्वकूपिनिके लोकतान्त्रिक आन्दोलनयात ग्वाहाली
बीत म्होतीइ नं छतका दां चन्दा अनिवार्य यानातःगु खः।
-----------------------------------------------------------------
जुजुं सन्देश मब्यु, परम्परा त्वाःदल
नेपाल संवत ११२६ न्हूदँया लसताय् सरकारपाखेँ कनिष्ठ उपाध्यक्ष कीर्तिनिधि
विष्टया जक सन्देश वःगु दु। थ्वसिबें न्हयः ०४६ सालया बहुदलीय व्यवस्था
पुनर्स्थापनाधुंकाः दँयदसं प्रधानमन्त्रीं शुभकामना सन्देश बीगु यानाच्वंगु
खः। नापं प्रधानमन्त्री न्हूदँया झ्वलय् बसन्तपुली जुइगु सभाय् नं मू अतिथिकथं
वइगु खः। थुगुसी मन्त्रिपरिषद्या अध्यक्ष स्वयं जुजु जुयाच्वंगुलिं थ्व
परम्परा त्वाःदःगु दु। थुगुसीया सभाय् सरकारपाखेँ सुंया नं प्रतिनिधित्व मजू।
निगूगु नम्बरय् लाकातःम्ह उपाध्यक्ष कीर्तिनिधि विष्टं म्हिगः हे छगू अौपचारिक
सन्देश बियाः सरकारया जिम्मा पूवंकेगु कूतः याःगु दु। मन्त्रिपरिषद्या
अध्यक्ष जुजुं धाःसा सन्देश मब्यु। थीथी राजनीतिक दलया नेतातयसं धाःसा सन्देश
ब्युगु दु।
-----------------------------------------------------------------
बसन्तपुलीं तःजिगु
सांस्कृतिक र्याली पिदन
भिडियो स्वयादिसँ
न्हूदँया लसताय् बुधवाः सुथय् ७ ता इलंनिसेँ बसन्तपुलीं छगू तःजिगु
सांस्कृतिक र्याली पिदन। र्यालीइ द्वलं द्व नेवाःतयसं ब्वति काःगु खः। नेकपा
एमालेया कार्यवाहक महासचिव वामदेव गौतमनापं मेमेपिं गैर नेवाः नेतातयसं नं
र्यालीइ ब्वति काःगु खः। र्याली थःने व क्वःने चाहिलेधुंकाः बसन्तपुली सभाय्
हिउगु खः। बसन्तपुली थीथी नेवाः सीडी, भीसीडी, सफू, क्यालेण्डर विशेष छुट बियाः
मियाच्वंगु खः।
र्यालीया मेमेगु
किपाः स्वयेत थन क्लिक यानादिसँ।
-----------------------------------------------------------------
पाकिस्तानया
भुखायपीडितपिन्त नेवाः समुदायपाखेँ छगू लाखतकाया ग्वाहाली
पाकिस्तानय् भुखाचं पीडित मनूतयगु निंतिं येँया नेवाः समुदायपाखेँ छगू
लाखतकाया ग्वाहाली बीगु जूगु दु। न्हूदँया लसताय् बसन्तपुली जूगु सभाय्
सभापतिया आसनं न्ववासेँ न्हूदँ समारोह समितिया नायः हिक्मतबहादुर मालीं थ्व
घोषणा यानादीगु खः।
-----------------------------------------------------------------
शंखधरया
व्यक्तित्त्व प्रेरणादायीः उपाध्यक्ष विष्ट
मन्त्रिपरिषद्या उपाध्यक्ष कीर्तिनिधि विष्टं तत्कालीन नेपाली समाजय् थःगु
उदारता व परोपकारी सेवाभावया हुनिं तःधंगु सम्मान व कीर्ति आर्जन यायेत सफल
राष्ट्रिय विभूति शङ्खधर साख्वाःया जीवनी व व्यक्तित्व झी सकसिगु निंतिं
प्रेरणास्पद जूगु धयादीगु दु। नेपाल संवत् ११२६या लसताय् भिंतुना सन्देश बिसेँ
वयकलं राष्ट्रिय विभूति साख्वाःया सश्रद्धा स्मरणनापं सकल नेपाली दाजुकिजा व
तता केहेँपिन्त भिंतुना देछाःगु दु।
उपाध्यक्ष बिष्टं नेपाल संवतया नेपाली समाजय् थःगु हे विशिष्ट थाय् व पहिचान
दुगु उल्लेखयासेँ थ्व संवतयात नेपालय् परिचित याकेत व नेपालभाषा व संस्कृतिया
संरक्षण व विकासया निंतिं नेपालभाषा मंकाः खलःपाखेँ यानावयाच्वंगु ज्यायात
च्वछायेबहःजूगु धासेँ सुभाय् नं देछाःगु दु।
-----------------------------------------------------------------
थीथी राजनीतिक दलया
नेतातपाखेँ भिंतुना
नेपाल संवत् ११२६ न्हूदँया लसताय् विभिन्न थीथी राजनीतिक दलया नेतातपाखेँ
भिंतुना सन्देश वःगु दु। नेपाली काँग्रेसया सभापति व पुलांम्ह प्रधानमन्त्री
गिरिजाप्रसाद कोइरालां नेपाल संवत् झीगु इतिहास, सभ्यता व संस्कृतिया जीवन्त
धरोहर जूगु धयादीगु दु। अथेहे नेकपा एमालेया कार्यवाहक महासचिव वामदेव गौतमं
नेपाल संवत् राष्ट्रिय गौरव, मौलिक म्हसिका व इतिहास समाविष्ट लोककल्याणकारी
चिन्तनपाखेँ प्रेरित जूगु धयादीगु दु।
राष्ट्रिय जनशक्ति पार्टी अध्यक्ष व पुलांम्ह प्रधानमन्त्री सूर्यबहादुर थापां
यस संवतं मुलुकय् सामाजिक, धार्मिक व साँस्कृतिक सद्भाव व सहिष्णुता
अभिवृद्धि यायेत तःधंगु ग्वाहाली याःगु धयादीगु दु। नेपाली काङ्ग्रेस
प्रजातान्त्रिकया कार्यवाहक सभापति गोपालमान श्रेष्ठं बियादीगु सन्देशय् थःगु
मौलिक संस्कृतियात ल्यंकातयेगु फुक्क नेपालीया मू कर्तव्य जूगु धयातःगु दु।
अथेहे माअोवादीया भ्रातृ संगठन नेवाः खलःया नायः पवनमान श्रेष्ठं नेवाःतयगु
पूर्ण मुक्तिया निंतिं संघर्षया मैदानं हे थःपिन्सं न्हूदँ न्यायेकाच्वनागु
धाःगु दु।
-----------------------------------------------------------------
नेपाल संवतयात आधिकारिक मान्यता बीत माग
नेपाल संवत ११२६ न्हूदँया लसताय् नेपालभाषा मंकाः खलःया नायः पद्ममरत्न
तुलाधरं बियादीगु सन्देशय् नेपाल संवत् राष्ट्रया स्वाभिमाननाप स्वाःगु मौलिक
संवत् जूगुलिं थुकियात छ्यलाबुलाय् हयेत सकल नेपाःमियात इनापयासेँ थ्व
संवतयात आधिकारिक मान्यता बीत श्री ५ या सरकारनाप माग यानादीगु दु।
नेवा देय् दबुया नायः मल्ल के. सुन्दरं नेपाल संवतया भिंतुना ज्याझ्वः केवल
छगू साँस्कृतिक प्रस्तुति जक मखसेँ सामाजिक जागरण व चेतनामुखी अभियान नं
जूगुलिं थुकियात उकथं हे न्हयाकेमाःगुली बः बियादीगु दु। नेपाल संवत् ८८८
दँतक आधिकारिक संवतया कथं प्रचलनय् वयाच्वंसां वि.सं.१९६० स राज्यस्तरं हे
उकियात रोक तःगु सरकारी समाचार एजेन्सी राससं धाःगु दु। नेपाल संवतया
प्रवर्तक शङ्खधर साख्वाःयात सरकारं वि.सं.२०५५ स राष्ट्रिय विभूति घोषणा याःगु
खः।
-----------------------------------------------------------------
